আজি সমগ্ৰ দেশতে উদযাপন কৰা হৈছে শিশু দিৱস; পণ্ডিত জৱাহৰলাল নেহৰুৰ জন্মদিন উপলক্ষে বিশেষ তাৎপৰ্য এই দিনটোৰ

ৰাজ্যিক • ১৪ নৱেম্বৰ • ২০২৬
শিশুসকলেই কাইলৈৰ নাগৰিক, নেতৃত্ব আৰু দেশৰ ভৱিষ্যৎ।
আজি ১৪ নৱেম্বৰ। সমগ্ৰ দেশতে বিভিন্ন কাৰ্যসূচীৰে উদযাপন কৰা হৈছে শিশু দিৱস। দেশৰ প্ৰথমগৰাকী প্ৰধানমন্ত্ৰী পণ্ডিত জৱাহৰলাল নেহৰুৰ জন্মদিন উপলক্ষে প্ৰতি বছৰে এই দিনটো ভাৰতত শিশু দিৱস হিচাপে পালন কৰা হয়। শিশুসকলৰ প্ৰতি থকা তেওঁৰ গভীৰ স্নেহ, মৰম আৰু আন্তৰিকতাৰ বাবেই এই দিনটোৱে বিশেষ তাৎপৰ্য বহন কৰি আহিছে।
১৮৮৯ চনৰ ১৪ নৱেম্বৰত উত্তৰ প্ৰদেশৰ এলাহাবাদত জন্মগ্ৰহণ কৰিছিল জৱাহৰলাল নেহৰুৱে। স্বাধীন ভাৰতৰ প্ৰথম প্ৰধানমন্ত্ৰী হিচাপে তেওঁ ১৯৪৭ চনৰ পৰা ১৯৬৪ চনলৈ দেশৰ নেতৃত্ব বহন কৰিছিল। শিশুসকলৰ সৈতে সময় কটাবলৈ ভাল পোৱা নেহৰুৰ জন্মদিনটো তেওঁৰ প্ৰতি শ্ৰদ্ধা নিবেদনৰ লগতে শিশুসকলৰ অধিকাৰ আৰু কল্যাণৰ প্ৰতি সজাগতা সৃষ্টিৰ উদ্দেশ্যে শিশু দিৱস হিচাপে উদযাপন কৰা হয়। শিশুসকলে তেওঁক মৰমেৰে ‘নেহৰু খুৰা’ বুলি সম্বোধন কৰিছিল।
জৱাহৰলাল নেহৰুৱে বিশ্বাস কৰিছিল যে শিশুসকলেই এখন দেশৰ ভৱিষ্যৎ। তেওঁলোকৰ শিক্ষা, স্বাস্থ্য, সুৰক্ষা আৰু সৰ্বাংগীণ বিকাশৰ ওপৰতেই এখন শক্তিশালী আৰু উন্নত ৰাষ্ট্ৰৰ ভেটি নিৰ্ভৰ কৰে। সেয়েহে শিশুসকলক উপযুক্ত শিক্ষা, সুস্থ পৰিৱেশ আৰু নিজৰ প্ৰতিভা বিকাশৰ সুযোগ প্ৰদান কৰাৰ ক্ষেত্ৰত তেওঁ বিশেষ গুৰুত্ব আৰোপ কৰিছিল।
শিশু দিৱসৰ ইতিহাস
শিশু দিৱসৰ ধাৰণাটো কেৱল ভাৰততে সীমাবদ্ধ নহয়। বিশ্বৰ বিভিন্ন দেশত শিশুসকলৰ কল্যাণ, অধিকাৰ আৰু সুৰক্ষাৰ প্ৰতি সজাগতা সৃষ্টিৰ উদ্দেশ্যে ভিন্ন ভিন্ন তাৰিখত এই দিৱস পালন কৰা হয়। ১৯২৫ চনত জেনেভাত অনুষ্ঠিত শিশু কল্যাণ সম্পৰ্কীয় বিশ্ব সন্মিলনত প্ৰথমবাৰৰ বাবে আন্তঃৰাষ্ট্ৰীয় শিশু দিৱসৰ ঘোষণা কৰা হৈছিল। পৰৱৰ্তী সময়ত ১৯৫০ চনৰ পৰা কেইবাখনো দেশে ১ জুনত আন্তঃৰাষ্ট্ৰীয় শিশু দিৱস উদযাপন কৰি আহিছে।
আনহাতে, ১৯৫৯ চনৰ ২০ নৱেম্বৰত ৰাষ্ট্ৰসংঘৰ সাধাৰণ পৰিষদে শিশুৰ অধিকাৰ সম্পৰ্কীয় ঘোষণাপত্ৰ গ্ৰহণ কৰে। সেই ঐতিহাসিক দিনটোৰ স্মৃতিত প্ৰতি বছৰে ২০ নৱেম্বৰত বিশ্ব শিশু দিৱস পালন কৰা হয়। এই দিৱসৰ মূল উদ্দেশ্য হৈছে বিশ্বৰ প্ৰতিগৰাকী শিশুৰ অধিকাৰ, মৰ্যাদা, শিক্ষা, স্বাস্থ্য আৰু সুৰক্ষা নিশ্চিত কৰাৰ ক্ষেত্ৰত জনসাধাৰণৰ মাজত সজাগতা বৃদ্ধি কৰা।
ভাৰতত অৱশ্যে ১৯৬৪ চনলৈকে ২০ নৱেম্বৰত শিশু দিৱস পালন কৰা হৈছিল। সেই বছৰ জৱাহৰলাল নেহৰুৰ মৃত্যুৰ পিছত তেওঁৰ জন্মদিন ১৪ নৱেম্বৰক শিশু দিৱস হিচাপে পালন কৰাৰ সিদ্ধান্ত গ্ৰহণ কৰা হয়। তেতিয়াৰ পৰাই প্ৰতি বছৰে এই দিনটো দেশজুৰি শিশু দিৱস হিচাপে উদযাপন কৰি অহা হৈছে।
দেশজুৰি বিভিন্ন কাৰ্যসূচী
শিশু দিৱস উপলক্ষে দেশৰ বিভিন্ন শিক্ষানুষ্ঠান, বিদ্যালয়, মহাবিদ্যালয় আৰু সামাজিক-সাংস্কৃতিক অনুষ্ঠানসমূহত বিশেষ কাৰ্যসূচীৰ আয়োজন কৰা হয়। এই উপলক্ষে সাংস্কৃতিক অনুষ্ঠান, চিত্ৰাংকন প্ৰতিযোগিতা, কুইজ, খেল-ধেমালি, নৃত্য-গীত আৰু বিভিন্ন সৃষ্টিশীল প্ৰতিযোগিতাৰ আয়োজন কৰা হয়। বহু শিক্ষানুষ্ঠানত শিশুসকলক উপহাৰ, মিঠাই আৰু অন্যান্য সামগ্ৰী বিতৰণ কৰাৰ লগতে তেওঁলোকৰ মাজত আনন্দ আৰু উৎসাহৰ পৰিৱেশ সৃষ্টি কৰা হয়।
শিশুৰ অধিকাৰ আৰু নিৰাপদ শৈশৱৰ গুৰুত্ব
শিশু দিৱসে শিশুসকলৰ প্ৰতি থকা আমাৰ সামাজিক আৰু নৈতিক দায়বদ্ধতাৰ কথাও সোঁৱৰাই দিয়ে। প্ৰতিগৰাকী শিশুৰে শিক্ষা লাভৰ অধিকাৰ, পুষ্টিকৰ খাদ্য, উন্নত স্বাস্থ্যসেৱা, সুৰক্ষিত পৰিৱেশ আৰু নিজৰ মত প্ৰকাশৰ স্বাধীনতা লাভৰ অধিকাৰ আছে।
বৰ্তমান সময়তো শিশুশ্ৰম, বাল্যবিবাহ, অপুষ্টি, শিক্ষাৰ পৰা বঞ্চিত হোৱা, শিশু নিৰ্যাতন আৰু বিভিন্ন সামাজিক সমস্যাই বহু শিশুৰ স্বাভাৱিক শৈশৱক বাধাগ্ৰস্ত কৰি আহিছে। এনে পৰিস্থিতিত শিশুসকলৰ অধিকাৰ সুৰক্ষিত কৰা, তেওঁলোকক উপযুক্ত পৰিৱেশ প্ৰদান কৰা আৰু প্ৰতিটো শিশুৰ বাবে সমান সুযোগ নিশ্চিত কৰাটো চৰকাৰ, অভিভাৱক আৰু সমাজৰ প্ৰতিগৰাকী ব্যক্তিৰ দায়িত্ব।
শিশুসকলেই কাইলৈৰ নাগৰিক, নেতৃত্ব আৰু দেশৰ ভৱিষ্যৎ। সেয়েহে তেওঁলোকৰ সপোন, সম্ভাৱনা আৰু প্ৰতিভাক উপযুক্ত দিশ প্ৰদান কৰাৰ লগতে এখন সুস্থ, শিক্ষিত আৰু মানৱীয় সমাজ গঢ়াৰ ক্ষেত্ৰত শিশুসকলক অগ্ৰাধিকাৰ দিয়াটো অত্যন্ত প্ৰয়োজনীয়। শিশু দিৱসৰ প্ৰকৃত তাৎপৰ্যও নিহিত হৈ আছে প্ৰতিগৰাকী শিশুৰ বাবে এখন নিৰাপদ, সুন্দৰ আৰু বৈষম্যহীন শৈশৱ নিশ্চিত কৰাৰ মাজত।
News Desk | People’s TV




