আন্তঃৰাষ্ট্ৰীয় • ২ নৱেম্বৰ, ২০২৬
আন্তঃৰাষ্ট্ৰীয় ক্ৰীড়াক্ষেত্ৰত টেনিছ, ক্ৰিকেট আৰু ফুটবলক কেন্দ্ৰ কৰি চৰ্চা অব্যাহত আছে। বিশ্ব টেনিছৰ ৰেংকিঙক লৈ নতুন খবৰ, নিউজিলেণ্ড ক্ৰিকেট দলৰ খেলুৱৈৰ আঘাতজনিত সমস্যা আৰু ইংলিছ প্ৰিমিয়াৰ লীগত আৰ্ছেনালৰ গুৰুত্বপূৰ্ণ জয়ে ক্ৰীড়াপ্ৰেমীৰ দৃষ্টি আকৰ্ষণ কৰিছে।
টেনিছত জেভেৰেভৰ ঐতিহাসিক কৃতিত্ব, আলকাৰাজৰ ভিয়েনা অ’পেন খিতাপ
বিশ্ব টেনিছত নতুন ইতিহাস ৰচিলে জাৰ্মানীৰ তাৰকা খেলুৱৈ আলেকজেণ্ডাৰ জেভেৰেভে। ২ নৱেম্বৰৰ পৰা প্ৰকাশিত ATP ৰেংকিঙত প্ৰথমবাৰৰ বাবে বিশ্বৰ এক নম্বৰ স্থান লাভ কৰে জেভেৰেভে। তেওঁ জেনিক ছিনাৰৰ স্থান দখল কৰি ATP ৰেংকিঙৰ ইতিহাসত বিশ্বৰ শীৰ্ষস্থান লাভ কৰা ৩০সংখ্যক পুৰুষ খেলুৱৈ হিচাপে পৰিগণিত হয়। আনহাতে, স্পেইনৰ কাৰ্লোছ আলকাৰাজে ভিয়েনা অ’পেনৰ ফাইনেলত অষ্ট্ৰেলিয়াৰ এলেক্স ডি মিনাউৰক ৬-১, ৬-৪ ছেটত পৰাস্ত কৰি খিতাপ অৰ্জন কৰে।
ভাৰতৰ বিৰুদ্ধে এদিনীয়া শৃংখলাৰ পূৰ্বে নিউজিলেণ্ডৰ মোক্ষম আঘাত, দলৰ পৰা বাদ ৰাচিন ৰবীন্দ্ৰ আৰু মাৰ্ক চেপমেন
ভাৰতৰ বিৰুদ্ধে আগন্তুক পাঁচখনীয়া এদিনীয়া আন্তঃৰাষ্ট্ৰীয় শৃংখলাৰ পূৰ্বে আঘাতৰ সমস্যাত পৰিছে নিউজিলেণ্ড ক্ৰিকেট দল। দলটোৰ দুই গুৰুত্বপূৰ্ণ বেটাৰ ৰাচিন ৰবীন্দ্ৰ আৰু মাৰ্ক চেপমেনক আঘাতৰ বাবে শৃংখলাটোৰ পৰা বাদ দিয়া হৈছে। নিউজিলেণ্ড ক্ৰিকেটে প্ৰকাশ কৰা অনুসৰি, ৰবীন্দ্ৰৰ সোঁ কান্ধত আঘাত লাগিছে আৰু চেপমেনৰ বাওঁ উৰুৰ হেমষ্ট্ৰিং সমস্যাৰ বাবে অধিক পুনৰ্বাসনৰ প্ৰয়োজন হৈছে। তেওঁলোকৰ স্থানত হেনৰী নিকোলছ, ডিন ফক্সক্ৰফ্ট আৰু টিম ছেইফাৰ্টক দলত অন্তৰ্ভুক্ত কৰা হৈছে। অহা বুধবাৰে অকলেণ্ডৰ ইডেন পাৰ্কত শৃংখলাটোৰ প্ৰথমখন খেল অনুষ্ঠিত হ’ব।
এনফিল্ডত আৰ্ছেনালৰ ঐতিহাসিক জয়, প্ৰিমিয়াৰ লীগৰ শীৰ্ষস্থানত পুনৰ গানাৰ্ছ
ইংলিছ প্ৰিমিয়াৰ লীগত লিভাৰপুলৰ ঘৰুৱা খেলপথাৰ এনফিল্ডত ১-০ গ’লৰ ব্যৱধানত জয়লাভ কৰি চৰ্চালৈ আহিছে আৰ্ছেনাল। দেওবাৰে অনুষ্ঠিত হাইভল্টেজ মেচখনত আৰ্ছেনালৰ হৈ একমাত্ৰ নিৰ্ণায়ক গ’লটো দিয়ে কাই হাভাৰ্টজে। খেলৰ ১৬ মিনিটতে ডেকলান ৰাইছৰ পৰা অহা বলত গ’ল কৰি দলক অগ্ৰগতি প্ৰদান কৰে তেওঁ। এই জয়ৰ জৰিয়তে ২০১২ চনৰ ছেপ্টেম্বৰৰ পিছত প্ৰথমবাৰৰ বাবে এনফিল্ডত জয়ৰ সোৱাদ লাভ কৰে আৰ্ছেনালে। লগতে ৯খন খেলৰ পৰা ২৪ পইণ্ট সংগ্ৰহ কৰি প্ৰিমিয়াৰ লীগৰ পইণ্ট তালিকাৰ শীৰ্ষস্থান দখল কৰে দলটোৱে।
মূল উৎস: ATP Tour, Reuters, New Zealand Cricket, Getty Images, Arsenal FC and The Guardian.
