ৰাজ্যিক • ৰহা• ২ নৱেম্বৰ ২০২৬
মন্ত্ৰিত্বৰ দায়িত্ব গ্ৰহণ কৰাৰ পিছত প্ৰথমবাৰৰ বাবে সোমবাৰে ৰহা স্থিত মীন মহাবিদ্যালয়ত উপস্থিত হয় অসম চৰকাৰৰ মীনমন্ত্ৰী নীলিমা দেৱী। মহাবিদ্যালয়খনত আয়োজিত ৩৯ সংখ্যক নৱাগত আদৰণি সভাত অংশগ্ৰহণ কৰি মন্ত্ৰীগৰাকীয়ে ৰাজ্যৰ মীন খণ্ডৰ সামগ্ৰিক উন্নয়ন, মীন বিভাগৰ ভৱিষ্যৎ পৰিকল্পনা আৰু ৰাজ্যত মীন আইন বলৱৎকৰণৰ ক্ষেত্ৰত চৰকাৰৰ স্থিতি সন্দৰ্ভত কেইবাটাও গুৰুত্বপূৰ্ণ মন্তব্য আগবঢ়ায়।
মীন মহাবিদ্যালয়খনত উপস্থিত হৈ মন্ত্ৰীগৰাকীয়ে শিক্ষাৰ্থী, শিক্ষক-শিক্ষয়িত্ৰী আৰু বিশ্ববিদ্যালয়ৰ বিষয়ববীয়াসকলৰ সৈতে মত বিনিময় কৰে। অনুষ্ঠানত ভাষণ প্ৰদান কৰি নীলিমা দেৱীয়ে ৰহা মীন মহাবিদ্যালয়লৈ আহি যথেষ্ট আনন্দিত আৰু আপ্লুত হোৱা বুলি প্ৰকাশ কৰে। মীন শিক্ষাৰ প্ৰসাৰ আৰু এই খণ্ডৰ সৈতে জড়িত শৈক্ষিক প্ৰতিষ্ঠানসমূহৰ ভূমিকা সন্দৰ্ভতো তেওঁ নিজৰ অভিমত ব্যক্ত কৰে।
ৰাজ্যৰ মীন খণ্ডৰ উন্নয়নৰ প্ৰসংগত মন্ত্ৰীগৰাকীয়ে কয় যে অসমৰ মীন সম্পদৰ সম্ভাৱনাক অধিক কাৰ্যকৰীভাৱে ব্যৱহাৰ কৰাৰ লক্ষ্যৰে বিভাগটোৱে বিভিন্ন উন্নয়নমূলক পৰিকল্পনা গ্ৰহণ কৰিছে। ৰাজ্যখনত মীন উৎপাদন আৰু মীন খণ্ডৰ সামগ্ৰিক বিকাশৰ বাবে ভৱিষ্যতে বিভিন্ন পদক্ষেপ গ্ৰহণৰ ওপৰত বিভাগটোৱে গুৰুত্ব আৰোপ কৰিছে। লগতে ৰাজ্যত মীন আইন বলৱৎ কৰাৰ ক্ষেত্ৰত অধিক কঠোৰ স্থিতি গ্ৰহণ কৰা হ’ব বুলিও তেওঁ উল্লেখ কৰে। মীন সম্পদৰ সংৰক্ষণ, সঠিক ব্যৱস্থাপনা আৰু নিয়ম-নীতিৰ যথাযথ প্ৰয়োগৰ ক্ষেত্ৰত আইনখনৰ গুৰুত্ব বিশেষ তাৎপৰ্যপূৰ্ণ।
উল্লেখ্য যে, অনুষ্ঠানৰ আন এক উল্লেখযোগ্য কাৰ্যসূচী হিচাপে মন্ত্ৰীগৰাকীয়ে মহাবিদ্যালয়খনৰ প্ৰাচীৰ পত্ৰিকা ‘দেৱালিকা’ আৰু বাৰ্ষিক আলোচনী ‘পিচিনা’ আনুষ্ঠানিকভাৱে উন্মোচন কৰে। এই প্ৰকাশনসমূহে শিক্ষাৰ্থীসকলৰ সৃষ্টিশীল প্ৰতিভা, সাহিত্য চৰ্চা আৰু শৈক্ষিক চিন্তা-চৰ্চাক এখন মঞ্চ প্ৰদান কৰাৰ লগতে মহাবিদ্যালয়খনৰ শৈক্ষিক আৰু সাংস্কৃতিক পৰিৱেশকো প্ৰতিফলিত কৰে।অনুষ্ঠানত অসম পশু আৰু মীন বিশ্ববিদ্যালয়ৰ উপাচাৰ্য ড০ নিৰঞ্জন কলিতা, ৰহাৰ বিধায়ক শশীকান্ত দাস আৰু অসম চৰকাৰৰ মীন বিভাগৰ সঞ্চালক গৌৰীশংকৰ দাস উপস্থিত থাকে। বিশিষ্ট অতিথিসকলৰ উপস্থিতিয়ে অনুষ্ঠানটোৰ গুৰুত্ব অধিক বৃদ্ধি কৰে।ইফালে, ৩৯ সংখ্যক নৱাগত আদৰণি সভাক কেন্দ্ৰ কৰি মহাবিদ্যালয়খনত এক আনন্দমুখৰ পৰিৱেশৰ সৃষ্টি হয়। নতুনকৈ নামভৰ্তি কৰা শিক্ষাৰ্থীসকলক আদৰণি জনোৱাৰ উদ্দেশ্যে আয়োজিত অনুষ্ঠানটোত ছাত্ৰ-ছাত্ৰীসকলে গীত-মাত আৰু বিভিন্ন সাংস্কৃতিক কাৰ্যসূচী পৰিৱেশন কৰে। নতুন শিক্ষাৰ্থীসকলৰ বাবে মহাবিদ্যালয় জীৱনৰ এক নতুন অধ্যায়ৰ আৰম্ভণি হিচাপে এই অনুষ্ঠান বিশেষ স্মৰণীয় হৈ পৰে।
মীনমন্ত্ৰী নীলিমা দেৱীৰ এই প্ৰথমটো ৰহা মীন মহাবিদ্যালয় ভ্ৰমণে ৰাজ্যৰ মীন খণ্ডৰ উন্নয়ন আৰু মীন শিক্ষাৰ সৈতে জড়িত প্ৰতিষ্ঠানসমূহৰ গুৰুত্বৰ বিষয়টো পুনৰ চৰ্চালৈ আনিছে।
- দেৱজিত দাস,সাংবাদিক, People’s Tv ৰহা
মূল উৎস : Assam Veterinary and Fishery University, College of fishery Science, Raha-Official
